مات الولد

+
----
-


يا ام الولد



الحرامى فى الضهر سرق
والقاتل ادام العيون قتل
والجلاد بكرباج الظلم جلد
والضعيف للقوى سجد
والخوف جوه النفوس اتولد
ودجال بيقول مدد
وحكاوى وجع مالها عدد
شوفتى الحال يا ام الولد
الولد ولدك يابلد
مات الولد
لااتقتل
فى طابور عيش اتخنق
بسكاكين الجهل اندبح
وبالف خنجر حزن انطعن
برصاص الكفر انضرب
مات الولد يا ام الولد
اتقتل يا بلد
والقاتل من غير مايهرب فلت
بكى وقال يا ولداه ع الولد
وقاتل مستنى مين هيتولد
وقاتل بيعد القبور وبيرصها ف خزاين
بيرص قبور فوق قبور وبالقبور مسرور
اصله شايفها فلوس وعليها صورة الولد
يا ام الولد
يابلد
روحى ريحالك
باكيه عيونى على حالك
ياما كنتى وكانت ايامك
بتوب العرس ياعروسه كان زفافك
كان الخير مكفى ولادك
فاكراها ليالى السهر
سهران فى خندق احمى ترابك
اهديكى دمى اللى سال على طرحة فستانك
كان دمى نيل يكفى طول ايامك
مات الولد يا ام الولد
وولد فاتنا وهجر
وولد باليأس قعد
وولد فى الغيط محصوله اتحرق
وولد فى الليل بيخاف حفيف الشجر
فاكرانى يابلد
لما كنت ولد
كنت طير حر عفى
كنت شجاع قوى كنت حبيب ليكى وفي
وكنت هايم فى احلى صبيه
ست الصبايا
كانت فى الجمال آيه
كانت اغلى غايه
ما اتن عارفه الحكايه
كنت اقعد تحت الشجر
واغنيلها غنوه
واغنيلك يابلدى الف غنوه
كانت اغانى الحانها حلوه
بس راحت فين الغنوه
راحت الصبيه واستنيتها تعود
تحت شجر التوت
من غير زاد ولا قوت
بعتلها مرسال مع كل اللى يموت
راحت الاغانى تموت
وفضل غناكى هو القوت
غنى ع الربابه ويا العود
راحت الصبيه ومش هتعود
وروحتلها انا مرسال واصل موصول
وفضلتى انتى يابلد
وهتفضلى مهما يفوت
يابلد ازرعى جناين ورد
وشجر توت
حوالين القبر المهدود
قبرى انا يا بلد
قبر الولد
يا ام الولد للشاعر احمد مصطفى