كان ياما كان يا ساده يا كرام
ما يحلى الكلام الا بذكر النبى عليه الصلاة والسلام
كان زمان قبل بدأ الخلايق كانت
الاخلاق الحميده زى
( الحب والخير والرقه والصدق و..........)
والاخلاق السيئه زى
( الكذب والغدر والخيانه و...........)
عايشين على الارض مع بعض
لحد ما زهقوا من الملل لانهم
مكنوش بيعملوا حاجه
ففيوم قال "الابداع "انا عندى فكره
واقترح عليهم يلعبوا لعبه جديده
كاناسمها استغمايه وشرح لهم بتتلعب ازاى
فعجبتهم وقرروا كلهم انهم يلعبوها
وكان اللى عليه انه يستغمى كان" الجنون"
فغمى الجنون عينه وبدأيعد
1 ....... 2........
فكل واحد شاف له مكان يستخبى فيه
"الرقه والاحساس" استخبوا فوق القمر
3 ........ 4.......
"الغدر والخيانه" فى وسط كومه كبيره من القمامه
5.......6.....7.....
اما "الكذب" فقال بصوت عالى "انا هستخبى ورا الصخره"
وراح جرى استخبى فى البحيره كذب عليهم لانه كذب ودا طبع فيه
كلهم جريوا واستخبوا الاواحد بس
كان "الحب" فضل متردد ومش عارف يروح فين
-طبعا عارفين ان الحب مش بيستخبى-
وفى الاخر طلع يجرى بسرعه واستخبى فى وسط الورد
مع اخر رقم قاله" الجنون"
8......9.......10
وبعدين قعد "الجنون" يدور عليهم ومسكهم كلهم الا الحب
معرفش هو مستخبى فين
و كان "الحقد" عارف ان الحب استخبى فى الورد وكان بيحقد على الحب لان "الجنون" معرفش يمسكه
فالحقد قال للجنون ان الحب مستخبى فى الورد بس الجنون خاف يروح عشان الشوك اللى فى الورد
فقاله الحقد خد الخشبه دى- وكان فيها مسامير كتير - اضرب بيها فى الورد فالحب يخاف ويخرج وبعدين تمسكه
ولان "الجنون" متسرع ومش بيفكر سمع كلام "الحقد "
لكن "الحب" مخرجش وبعد شويه سمعوا صوت بكى يقطع القلب
كان صوت" الحب" لان مسمار من المسامير اللى كانوا فى الخشبه دخل فى عنيه
وبقى" الحب" اعمى ومش بيشوف
فكلهم زعلوا عليه ومكنوش عارفين ازاى الحب هيعرف يمشى وهو مش بيشوف
فقال الجنون" انا هسحبه لانى انا السبب ولازم اتحمل نتيجة غلطتى"
كلهم وفقوا على الاقتراح ده
ومن يميها والحب أعمى يقوده الجنون.